Act 25 | NAS | STEP | Enang tee Peestasi ovoꞌmaꞌ deemparara beenang doong tankinuko Jerusalemaꞌaape daanto beuꞌ Sisariaꞌketa.

Acts 25

Paulaꞌ Deravari Eentavaruꞌnaꞌ Siisaꞌke Kara Simpeꞌevuuꞌnaang

1 Enang tee Peestasi ovoꞌmaꞌ deemparara beenang doong tankinuko Jerusalemaꞌaape daanto beuꞌ Sisariaꞌketa. 2 Eeꞌnoko teka tavoꞌarako piristiꞌnanka-koo ovontunge eeꞌnoko Juꞌnupoong-koo pankenankai Paulaꞌ tuumpiaakoꞌning nauauꞌ. 3 Eeꞌnoko aaꞌnaꞌ etuauꞌ tee eentavarima tee botoarako Paulaꞌ Jerusalemaꞌaape tavoꞌaavaꞌnaang, taunga tavaavaꞌnaang maroauꞌnaꞌ noruꞌai. 4 Peestasie makuꞌurima aaꞌpuuꞌ, “Paulaꞌ tee Sisariaꞌke tareai otomaung eeꞌnoko ning tee dueꞌka meeꞌnaang noruꞌmaramang. 5 Teeꞌkoo diiꞌkoo niiꞌning pankenanka niꞌninka nariꞌ danto meriaing. Kapooꞌ orakaꞌ nkovuuꞌning otoko tee-koo deekoꞌ teka diiꞌke tuumpieriai.”

6 Teketa Jerusalemaꞌketa kivora doong divuꞌuaruko Peestasi danto Sisariaꞌaape beuꞌ. Eeꞌnoko daunaꞌmung kara simpeꞌdoma baꞌnanura Paulaꞌ poꞌantavaavaꞌnaang botoaruꞌ. 7 Eeꞌnoko tenang Paulaꞌ kuung poioꞌ teing Juꞌnupoong Jerusalemaꞌketa danto berouꞌning tee koroai donkonaara kapooꞌ mmauꞌnanka ivekeng-koo tuumpiaara masikaꞌantanooꞌ otoroaruuꞌ. 8 Teketa Paulaꞌke penkemparama aaꞌpuuꞌ, “Ninge kapooꞌ teing aing eeꞌ oroꞌ totoꞌpui otoing nkoampaꞌ: Juꞌnupoong biikaang boto, dootuuꞌnava pankava eeꞌnoko tee Roomaꞌnung daurarong~ Siisaꞌ.” 9 Teka Peestasie Juꞌnupoong dotu-anta-koo aaꞌpuuꞌ tee Paulaꞌ, “Daꞌ ee Jerusalemaꞌaape daanto beꞌkoo arooꞌdari otong teka paararaavainaꞌ teing aing kapooꞌ ning-koo dutakanooꞌka tuumpiraining-koo?”

10 Teka Paulaꞌke aaꞌpuuꞌ, “Ning aaꞌ Siisaꞌ bakanooꞌ kara simpeꞌdoma donkonansi oꞌnong, aaꞌ eeꞌnooꞌ ning tuutunang-koo makosinooꞌ, aiꞌ ning Juꞌnupoong-koo kapooꞌ orara nkoampaꞌ, teeꞌ dake tampaꞌ noruꞌei otong. 11 Ning kapooꞌ orarananka-nko deekoꞌ eeꞌnoko kapooꞌ ning booꞌkoo makosi nkoantuꞌnung deekoꞌ ning booꞌketa mmariꞌkoo paaramaravarupeuꞌ, teka teing kapooꞌ ning tuumpimaamaing boturopananka deempari otoko naning otoaꞌ teing-anko sing-antamupeuꞌnung, aiꞌ ning tee Siisaꞌkoo arooꞌmari oꞌnong teie paaramuaing.”

12 Teketa Peestasie bakaning tuutunang-koo~ norukasiꞌnanka ninka minkuarira aaꞌpuuꞌ tee Paulaꞌ, “Siisaꞌkoo arooꞌdaring tampeioꞌ aaꞌdamaang: Makosi, tee-anko Siisaꞌanko naniaing.”

Peestasie Akiripaꞌ Niaꞌuuꞌnaꞌ Paulaꞌkoo

13 Enang tee, niiꞌning doong divuꞌuioꞌ tee Akiripaꞌ, daurarong~, teni ninka baaraꞌmaꞌnaang Beenis ninka, Sisariaꞌ tavoꞌkuretuꞌ Peestasi onkeonkeꞌureeꞌnaang. 14 Eeꞌnoko teke mmauꞌ doong otorora Peestasie Paulaꞌ bakanaiꞌ tee daurarong nauvuma aaꞌpuuꞌ, “Anke naning narung otomang Piiliksie kiimatanava-koo otoko sipura tenkenuuꞌnung. 15 Eeꞌnoko tenang ning Jerusalemaꞌ oꞌnoko teing piristiꞌnanka-koo ovontunge eeꞌnoko pankenankai Juꞌkoo-nupoonge tee dooremaama niaꞌmauꞌ tee kara taaraevomira dupisiꞌkoo makosi tampamaꞌnaang. 16 Teketa ninge aaꞌparantuꞌ teing, ‘Niiꞌ Roomaꞌnupoong teeꞌ nkomariaung naning niiꞌninge dupisiꞌkoo sing-antavampiiꞌnaang tutung tuumpiaamaing ninka oing ooveearuko, napoꞌ doona penkemparavaing-koong oovuaruko.’

17 “Tenang teing ninge nauaransioꞌ aꞌ oosiariruꞌnang ning nemaravaꞌ daunaꞌmung kara simpeꞌdoma baꞌnanamira botomaruꞌ tee naning poꞌantavaavaꞌnaang. 18 Teketa tenang teinge tuumpiaakoꞌninge donkonaara teinge kapooꞌkoo oreng-pinaꞌ ninge tero noruꞌantuꞌning-koo tuumpiaavaꞌ. 19 Teka niiꞌning kapooꞌ oovuning-koo turampaakoꞌ daang masikaꞌantavaamaing-koo, eeꞌnoko naning narung-koo Jiisuuꞌkoo booꞌparuꞌnung-koo teka Paulaꞌke domamparuꞌnung tampukooꞌ. 20 Ning amuriiꞌ kapooꞌ baakeeneama simpeꞌkoo paaꞌmarara ninge niaꞌantuꞌ aaꞌpama, ‘Daꞌ ee Jerusalemaꞌaape nanipeuꞌ eeꞌnoko teka diiꞌ Juꞌ diikaning koompaaraꞌnavitue simpeꞌdaavai dakanaiꞌkoo?’ 21 Teka tenang Paulaꞌ Siisaꞌke simpeꞌuuꞌnaang tamparako ning botomaruꞌ pinkaꞌai tanatavaavaꞌnaang bera Siisaꞌanko botoampainooꞌke basi.”

22 Eeꞌnoko Akiripaꞌke Peestasi aaꞌpuuꞌ, “Ninge ninka taara-koo piamomaang tee aung naning.” Eeꞌnoko Peestasie aaꞌpuuꞌ, “Makosi, taneꞌ taaraveaing tee.”

23 Teketa daunaꞌmung tee Akiripaꞌ eeꞌnoko baaraꞌmaꞌnaang Beenis, dauraronanka biikaninge nepunepuꞌke aaꞌnaꞌ nepuꞌaresi poreta tumparetuꞌ teꞌ tuutunang nkoroma eeꞌnoko teing kivora daakuꞌ piatooronuka tanatanuka nariꞌ porouꞌ eeꞌnoko teing nantoong tevuntuꞌkoo boreꞌnuka. Teketa tee Paulaꞌ Peestasie botovurioꞌ asiꞌnaꞌmoo poꞌantavauꞌ. 24 Eeꞌnoko teketa Peestasie aaꞌpuuꞌ, “Daꞌ Daurarong Akiripaꞌ eeꞌnoko diiꞌ ookara aꞌ niiꞌ ninka nariꞌ porining, ooveriai aung naning Juꞌnupoonge ning eentamaamaung ookeng-koo aaꞌnoko Jerusalemaꞌka eeꞌnoko anka, otoarooꞌnaang tampaamaung peusiꞌkaama. 25 Teka ninge kapooꞌ tee booꞌanta-koo makosi ooampaꞌ. Eeꞌnoko eeꞌnara baka Siisaꞌke simpeꞌuuꞌnaang tamparioꞌ ninge Siisaꞌanko botoamaꞌnaang matauantuꞌ. 26 Teka ninge kapooꞌ taaꞌniꞌantavama daariampaing otoꞌmemuaꞌ tee nkaang ovoring nauama tee-koo. Teeꞌkoo ninge aꞌ diiꞌanko, eeꞌnoko baruꞌnooꞌ daꞌanko daurarong Akiripaꞌanko donkong-antavansing anketa paaravampira kapooꞌ oreng ooampiaining daariamaꞌnaang. 27 Aiꞌ ninge eeꞌ ooamaang, ninge naning kiimatanung tamung boturopa botoamparupeuꞌ tuumpiaamaing-koong sirakaꞌanta otoaruko.”